Аншлаг на бегавых дарожках. Спартыўная абноўка ўпрыгожыла стадыён «Колас» у Ляхавічах

Спартыўная абноўка ўпрыгожыла стадыён «Колас». Першымі яе пратэсціравалі ўдзельнікі ІІ адкрытага турніру па лёгкай атлетыцы памяці чэмпіёна Еўропы Генадзія Валюкевіча.

Доўгачаканая абноўка
На ўрачыстае адкрыццё капітальна адрамантаванага аб’екта завіталі госці з Мінска, Брэста, прадстаўнікі нацыянальнай каманды Беларусі па лёгкай атлетыцы, абласнога цэнтра алімпійскага рэзерву па лёгкай атлетыцы, кіраўніцтва раёна, ветэраны спорту Ляхавіччыны. Канешне, у цэнтры ўвагі юныя спартсмены, для якіх у краіне і ў нашым раёне робіцца нямала для развіцця творчых і спартыўных здольнасцей. Запоўнены трыбуны, вакол святочная радасная атмасфера, усе ў чаканні ўрачыстага імгнення…
Ганаровае права перарэзаць чырвоную стужку дадзена старшыні райвыканкама Мікалаю Марозу, старшыні Беларускай федэрацыі лёгкай атлетыкі неаднаразоваму прызёру Алімпійскіх гульняў Івану Ціхану, майстру спорту міжнароднага класа ў трайным скачку з разбегу Дзмітрыю Валюкевічу – сыну нашага знакамітага земляка чэмпіёна Еўропы Генадзія Валюкевіча. Стужка перарэзана, і пачаўся адлік новай гісторыі стадыёна «Колас».

Чым адзначыўся турнір
Адкрыццё бегавых дарожак супала яшчэ з адной важнай падзеяй у спартыўным жыцці рэгіёна. 23 верасня стартаваў ІІ адкрыты турнір па лёгкай атлетыцы памяці майстра спорту міжнароднага класа, чэмпіёна Еўропы Генадзія Валюкевіча сярод юнакоў і дзяўчат 2007 года нараджэння і маладзейшых. Менавіта юным лёгкаатлетам Брэстчыны пашанцавала першымі паставіць адзнаку якасці абноўленым бегавым дарожкам. І водгукі толькі станоўчыя.
З прывітальным словам да рабят, трэнераў з пажаданнямі паспяховых стартаў, перамог і дасягненняў звярнуліся Мікалай Мароз, Іван Ціхан, Дзмітрый Валюкевіч, благачынны цэркваў Ляхавіцкай акругі протаіерэй Георгій Жытко. Дзмітрый Валюкевіч уручыў пераходны кубак камандзе Ляхавіцкай СДЮШАР – пераможцы ў камандным заліку І турніру памяці Генадзія Валюкевіча.
Усяго дзясятак хвілін на невялікі перапынак, далей міні-трэніроўка, і стартавала спартыўная частка спаборніцтваў. Удзел у ёй узялі каманды з Ганцавіцкага, Івацэвіцкага, Столінскага, Пінскага, Ляхавіцкага раёнаў, горада Баранавічы, Брэсцкіх цэнтра алімпійскага рэзерву і вучылішча алімпійскага рэзерву.
На працягу двух дзён юныя спартсмены вызначалі мацнейшага ў бегу, спартыўнай хадзьбе, скачках.
Сярод тых, хто падымаўся на п’едэстал гонару, былі і ляхавічане: у нашай скарбонцы па чатыры залатыя і сярэбраныя медалі і пяць бронзавых. Ва ўпартай барацьбе ляхавіцкая спартыўная дружына
другі год запар заняла ганаровае першае месца, такім чынам, пераходны кубак застаўся ў Ляхавічах. Другое месца заваявала Баранавіцкая СДЮШАР, а трэцяе месца – дружына Брэсцкага
цэнтра алімпійскага рэзерву. Як адзначыў галоўны суддзя турніру трэнер-выкладчык Ляхавіцкай СДЮШАР Андрэй Іванюценка, галоўны прыз – добры настрой – дастаўся кожнаму з юных спартсменаў, трэнераў, балельшчыкаў і суддзяў.

Галіна КАНЬКО.
Фота Сяргея ВАРАНОВІЧА.

Іван ЦІХАН:
– Тое, што ўбачыў у Ляхавічах на стадыёне, надзвычай уразіла і, канешне, з лепшага боку. Цудоўныя дарожкі атрымаліся. У хлопчыкаў і дзяўчынак ёсць усё самае неабходнае трэнеры-прафесіяналы, выдатныя ўмовы для трэніровак, падтрымка раённай улады, клапатлівыя бацькі. Юныя спартсмены Ляхавіцкага раёна маюць унікальную магчымасць паўтарыць поспехі свайго славутага земляка Генадзія Валюкевіча і дасягнуць сусветных вяршынь у спорце. Трэба толькі вельмі старацца, шмат трэніравацца, выконваць рэкамендацыі трэнераў. І рэкорды і перамогі не прымусяць сябе чакаць. Работа з моладдзю вельмі важная і патрэбная. Заняткі спортам павышаюць імунітэт, закладваюць
фундамент здароўя.

Мікалай МАРОЗ:
– Раённая ўлада па магчымасці стараецца падтрымліваць развіццё спорту ў рэгіёне, юныя таленты. Штогод наша СДЮШАР набірае каля 400 дзяцей, якія паспяхова выступаюць на розных турнірах. Каб поспехі былі і далей, трэба паляпшаць спартыўную інфраструктуру. Каб палепшыць умовы для трэніровак юных спартсменаў, стварыць больш камфортныя ўмовы для аматараў здаровага ладу жыцця, патрабуецца рэканструкцыя пэўных аб’ектаў стадыёна. Прапрацавалі розныя варыянты і спыніліся на капітальным рамонце дарожак. Раённы бюджэт прафінансаваў работы.
І вось ўсё атрымалася –
бегавыя дарожкі прымаюць спаборніцтвы. Упэўнены, што ляхавіцкія рабяты, якія маюць прык-лад сваіх знакамітых землякоў-спартсменаў, гучна заявяць пра сябе на спартыўных стартах як у нашым раёне, так і за яго межамі і папоўняць скарбонку спартыўных перамог. Плануем і ў далешым чарговыя спартыўныя абноўкі для Ляхавіччыны, у прыватнасці, рамонт трыбун і, магчыма, футбольнага поля.

Дзмітрый ВАЛЮКЕВІЧ:
– Прыемна, што на Ляхавіччыне помняць і шануюць свайго земляка, майго бацьку – чэмпіёна Еўропы Генадзія Валюкевіча. Ён заўжды з радасцю і асаблівым натхненнем прыязджаў на сваю малую радзіму, дзе на працягу многіх гадоў праходзіў турнір па лёгкай атлетыцы на прызы Валюкевіча. Было вырашана прадоўжыць традыцыю. Па-добраму зайздрошчу тутэйшым рабятам, у Ляхавічах выдатныя ўмовы для развіцця спорту і лёгкай атлетыкі ў прыватнасці.