На «Зімовым маршруце» студатрадаўцаў. Байцы зводнага студэнцкага атрада «Лёд і полымя» наведалі Жарабковіцкую і Начаўскую СШ

Байцы зводнага студэнцкага атрада «Лёд і полымя» наведалі Жарабковіцкую і Начаўскую СШ. На патрыятычным маршруце актывістаў і памятныя месцы. Помнікі ў Зубелевічах (на здымку) і Начы аднавяскоўцам, загінулым падчас Вялікай Айчыннай вайны, сталі часткай гісторыка-патрыятычнага праекта БРСМ «Лічбавая зорка».

23 студзеня Брэстчына стала стартавай пляцоўкай рэспубліканскага працоўнага патрыятычнага праекта «Зімовы маршрут». 25-26 студзеня прымаць студатрадаўскую эстафету пашчасціла Ляхавіцкаму раёну.

Права першымі сустрэць байцоў зводнага студэнцкага атрада «Лёд і полымя» было прадастаўлена Жарабковіцкай СШ імя М. Г. Мінкевіча. Урачыстая лінейка сапраўды падарыла шмат урачыстых момантаў. А раздзялілі з удзельнікамі праекта святочнасць падзеі старшыня раённага Савета дэпутатаў Юрый Чаранкевіч, намеснік старшыні райвыканкама Святлана Юрлевіч, начальнік аддзела па адукацыі райвыканкама Святлана Якубоўская.
– Сёння ляхавіцкая моладзь у складзе грамадскіх аб’яднанняў, у тым ліку БРСМ, Маладзёжнага парламента праяўляе сябе ў розных праектах. Галоўнае, што гэтыя праекты напоўнены справамі, якія ідуць ад шчырага сэрца. Нашы рабяты далучыліся да рэспубліканскіх акцый «Ад усёй душы» і «Цуды на Каляды», узялі шэфства над домам сумеснага пражывання для адзінокіх пажылых грамадзян і інвалідаў, дабрачынна пакалядавалі і падарылі навагодні цуд шматдзетным сем’ям. Ініцыююць, рэалізуюць – адным словам, дзейнічаюць. А сёння ў нашых рабят ёсць унікальная магчымасць пераняць вопыт у байцоў зводнага студатрада, – адзначыў Юрый Чаранкевіч і пажадаў плённай работы.
Для ляхавічан прымаць студатрадаўцаў удвая ганарова. Як адзначыла Святлана Юрлевіч, студэнцкі рух на Ляхавіччыне запатрабаваны і прэстыжны. Ляхавіччына ў гэтым плане ў абласных лідарах: 2022 год у раёне адзначыўся працай 17 студатрадаў. Удзельная вага працаўладкаванай ў 2022 годзе ў складзе студатрадаў моладзі да агульнай колькасці моладзі раёна складае 5,3 працэнта пры сярэднеабласным паказчыку 3,5 працэнта.
Падзяку Ляхавіцкаму райвыканкаму за арганізацыю і правядзенне рэспубліканскага працоўнага патрыятычнага праекта «Зімовы маршрут» уручыла камісар абласнога штаба студатрадаў Анастасія Літвінчук.
З сабой студатрадаўцы захопяць не толькі прыемныя ўспаміны пра праект, а яшчэ і часцінку нашага гасціннага ляхавіцкага каларыту. «Пашпарт турыста» і той самы смачны пернік, сувеніры ад райкама БРСМ і Жарабковіцкай СШ.
З’явіцца ва ўстанове адукацыі і адметны памятны знак праекта «Зімовы маршрут». Дырэктару Жарабковіцкай школы Вользе Бурак сімвалічны напамін уручыў камандзір атрада «Лёд і полымя» Мікіта Бацун.
А пасля пачалося бадай самае цікавае. У кожным класе кіпела творчая работа. Старшакласнікі пагрузіліся ў прафарыентацыйную атмасферу «Дарога ў будучыню», наконт бяспекі сучаснай атамнай энергетыкі пагаварылі падчас навукова-гульнявой праграмы «Атамны адрэналін», інтэлектуальны этап чакаў рабят на гульні «Мая краіна Беларусь». А яшчэ вучыліся плесці фенечкі ў майстэрні «Умелыя ручкі», а самыя маленькія малявалі і збіралі пазлы на майстар-класе «Пазнай Беларусь з маленства».
Далей рабяты разам рушылі ў Зубелевічы. Спраў па гэтым адрасе таксама шмат. Сярод галоўнага – клопат пра землякоў шаноўнага ўзросту. 88-гадовая жыхарка Зубелевіч у гэты дзень атрымала не толькі зарад энергіі, але і даверыла студатрадаўцам дамашнія клопаты.
Памятаць і перадаваць самую галоўную каштоўнасць чалавецтва – мір – задача кожнага. Яшчэ адзін памятны аб’ект стане часткай гісторыка-патрыятычнага праекта БРСМ «Лічбавая зорка». Цяпер QR-код з’явіўся і ў зубелевіцкага помніка аднавяскоўцам, якія загінулі ў гады Вялікай Айчыннай вайны.
Пасля байцы зводнага студэнцкага атрада «Лёд і полымя» падарылі школьнікам шыкоўны канцэрт у Жарабковіцкім СДК.
А прыемным завяршэннем першага дня праекта стала экскурсія ў ляхавіцкую турыстычную жамчужыну – Грушаўку.

Не менш насычаным атрымаўся і другі дзень. 26 студзеня студатрадаўцаў сустракала Начаўская СШ. Пасля ўрачыстай лінейкі госці акунулі начаўскіх школьнікаў у карагод віктарын, інтэрактываў, прыгод, гульняў і змястоўных размоў. Канешне, не абышлося без сувеніраў ад начаўскіх школьнікаў.
Рабяты заехалі па яшчэ адным адрасе – начаўскім, дзе таксама крышачку пагаспадарылі і дапамаглі разабрацца з хатнімі справамі тутэйшаму пенсіянеру.
Таксама і ў Начы з’явілася «Лічбавая зорка». Цяпер QR-код з гісторыяй з’явіцца на месцы помніка загінулым у гады Вялікай Айчыннай вайны аднавяскоўцам.
– Студатрадаўскі рух – гэта і праца, і вопыт, і, канешне, знаёмствы – а гэта бясцэнна. Разам працаваць, вандраваць, адпачываць, ствараць і пазнаваць нашу Беларусь. Рабяты з БРСМ сёння развіваюцца ў розных напрамках, і тое, што гэта дае свой плён, пацверджана. Вельмі прыемна, што з Брэстчыны гэты праект стартаваў, і мы, ляхавіцкая моладзь, прымаем на нашай гасціннай зямлі байцоў з атрада «Лёд і полымя». А ў Год міру і стварэння такімі справамі моладзь толькі ўмацоўвае бясцэнны беларускі мір, – адзначыла першы сакратар райкама БРСМ Анастасія Дземідовіч.

Маргарыта КУХТА-МАСЛОЎСКАЯ.
Фота Сяргея ВАРАНОВІЧА.