З «халоднага красавіка» ў «цёплы лістапад». У раёнцы зафіксавана. Сённяшнія дасягненні і здабыткі працаўнікоў ААТ «ТБЗ Ляхавіцкі» сапраўды ўражваюць

Сённяшнія дасягненні і здабыткі працаўнікоў ААТ «ТБЗ Ляхавіцкі» сапраўды ўражваюць. Прадпрыемства, якое спецыялізуецца на здабычы і перапрацоўцы торфу – адно з паспяховых у паліўнай галіне Беларусі. Тухавіцкія брыкеты, сушонка, іншая прадукцыя вядомы і запатрабаваны не толькі ў Беларусі, але і за яе межамі. Каторы год запар завод выконвае і перавыконвае план здабычы торфу… Але так было не заўжды.

У артыкуле «Халодны красавік торфабрыкетчыкаў» у «Ляхавіцкім весніку» за 14.04.2001 было адзначана: «…Прадпрыемства забылася, калі працавала на поўную магутнасць. Склад забіты торфабрыкетамі… Завод ходзіць у даўжніках за электраэнергію…». 28 красавіка 2001 года пад рубрыкай «Інтэрв’ю з нагоды» падчас размовы з карэспандэнтам «ЛВ» колішні старшыня райвыканкама Аркадзій Сакун сярод іншых праблемных момантаў адзначае наступнае: «…Фактычна ў цэйтноце апынуўся торфабрыкетны завод – адно з самых магутных прадпрыемстваў раёна. Прадукцыя, якая яшчэ не так даўно ішла нарасхват, аказалася раптам незапатрабаванай».
Спатрэбіўся час і значная падтрымка з боку дзяржавы, у тым ліку ў выглядзе датацый, а таксама тэхнічнае перааснашчэнне, абнаўленне тэхнапарка і граматная кадравая палітыка, каб вярнуць колішнюю магутнасць і сілу торфабрыкетнаму заводу з больш чым паўвекавой гісторыяй. Дарэчы, сёлета ў жніўні міністр энергетыкі Аляксей Кушнарэнка падкрэсліў: «Яшчэ напачатку 1990-х гадоў стаяла пытанне – ці будзе ў прынцыпе існаваць такая прамысловасць у Беларусі. І толькі пры падтрымцы Прэзідэнта і ўрада была прынята дзяржаўная праграма «Торф», якая паслужыла сапраўдным імпульсам для тарфянікаў». Былі абноўлены асноўныя фонды, мадэрнізавана вытворчасць. Зараз тарфяная прамысловасць прадстаўлена 18 прадпрыемствамі, 17 з якіх займаюцца здабычай і перапрацоўкай торфу.
За 10 месяцаў 2024 года аб’ём вытворчасці выпускаемай прадукцыі на ААТ «ТБЗ Ляхавіцкі» павялічыўся на 5 працэнтаў у параўнанні з аналагічным перыядам 2023 года.
Выпушчана 108 тысяч тон брыкету і 55 тысяч тон сушонкі. Добра спрацавалі і на экспарт: заводскія пастаўкі за межы Беларусі склалі 106 працэнтаў да ўзроўню 2023 года.