Прафілактыка на крок наперадзе. У Падлескім СДК прайшоў сельскі сход

Частай прычынай вогненных здарэнняў становяцца нядбайнасць і грэбаванне правіламі бяспекі. Яшчэ адно трагічнае пацвярджэнне – нядаўні выпадак са смяротным зыходам у вёсцы Крывошын, дзе, па папярэдняй інфармацыі, да бяды прывяло неасцярожнае абыходжанне з агнём пры курэнні.

Дзеля прыцягнення ўвагі насельніцтва да важнасці клопату пра ўласную  бяспеку і бяспеку іншых, безумоўнага выканання правілаў бяспечных паводзін у Падлескім СДК прайшоў сельскі сход.
Жарабковіцкі сельсавет невыпадкова стаў месцам правядзення сходу: тут, у параўнанні з аналагічным перыядам 2023 года, назіраецца рост пажараў – пяць сёлетніх супраць трох мінулагодніх. А летась у вёсцы Сваятычы на пажары загінулі двое дзяцей. Сёння размова не ідзе пра тое, ці можна было пазбегнуць трагедыі. Важна, каб бяда не прыйшла зноў!
Старшыня райсавета дэпутатаў Юрый Чаранкевіч акцэнтаваў увагу прысутных на актуальнасці размовы і неабходнасці зрабіць свой дом бяспечным усім, незалежна ад узросту. З пачатку года на Ляхавіччыне зарэгістравана 28 пажараў, з якіх 22 – у жыллі, агучыў пажарную статыстыку намеснік старшыні райвыканкама Алег Траццяк і падкрэсліў, што суб’екты прафілактыкі ў сваёй дзейнасці павінны быць на крок наперадзе і асабліва ў ацяпляльны сезон пільную ўвагу надаць уразлівым катэгорыям насельніцтва.
Сярод прычын пажараў у раёне начальнік РАНС Юрый Буйкевіч назваў парушэнне правілаў эксплуатацыі пячнога ацяплення і электраабсталявання, неасцярожнае абыходжанне з агнём і іншыя. Таксама прывёў прыклады пажараў, на якія выязджалі падраздзяленні РАНС, і заклікаў не ствараць сваімі паводзінамі і дзеяннямі пажаранебяспечныя сітуацыі. Добрым памочнікам у папярэджанні ўзгаранняў па-ранейшаму лічыцца аўтаномны пажарны апавяшчальнік. Менавіта яго начальнік РАНС уручыў пераможцы розыгрышу ўстройства сярод удзельнікаў сходу. Шчаслівай уладальніцай АПА стала жыхарка аграгарадка Надзея Бацкалевіч.

Тэму бяспекі прадоўжыў начальнік АДАІ РАУС Яўгеній Вайшэвіч, які агучыў дарожную статыстыку: з пачатку года на тэрыторыі раёна здарылася 15 ДТЗ, у якіх загінулі пяць чалавек. Адно з нядаўніх ДТЗ зафіксавана ў аграгарадку Падлессе, галоўным фігурантам стаў нецвярозы пешаход. Сярод прычын ДТЗ – парушэнне аўтамабілістамі правілаў абгону, выезд на паласу сустрэчнага руху, кіраванне транспартным сродкам п’янымі вадзіцелямі, парушэнне
ПДР пешаходамі і веласіпедыстамі. Дзеля стабілізацыі сітуацыі супрацоўнікі АДАІ праводзяць прафілактычныя гутаркі не толькі ў працоўных калектывах і сярод аўтаўладальнікаў, але і ва ўстановах адукацыі раёна – выхоўваць паважлівае стаўленне да ПДР неабходна з дашкольнага ўзросту. І, дарэчы, зваротная сувязь не прымусіла чакаць. Сярод удзельнікаў сходу – выхаванцы дзіцячага сада. Адзін
з нераўнадушных хлопчыкаў звярнуўся да міліцыянера з просьбай паўплываць на хуткую язду машын і на тое, што з грузавога транспарту падаюць на дарогу буракі. Заўвагі прыняты да ведама і абавязкова будуць прыняты адпаведныя меры. Яўгеній Вайшэвіч таксама папярэдзіў веласіпедыстаў пра забарону карыстання двухколавым транспартам у снегапад, нагадаў пра асцярожнасць пры пераездзе чыгункі і г. д.
Пра цану раўнадушша і грэбавання бяспекай гаварыў і старшыня сельвыканкама Ігар Віхноўскі, які папрасіў не пакідаць без увагі выпадкі парушэнняў.
У цэнтр увагі зламыснікаў, як правіла, трапляюць пажылыя і адзінокія грамадзяне, адзначыў начальнік ААПП Сяргей Хмарук і рэкамендаваў дарослым дзецям быць больш пільнымі да бяспекі сваіх састарэлых бацькоў. Асобна спыніўся на пытаннях кібербяспекі.
Пра сацыяльную падтрымку ўразлівых катэгорый насельніцтва расказала загадчыца аддзялення першаснага прыёму, аналізу, інфармавання і прагназавання ТЦСАН Наталля Ісаханава. Так, з пачатку года ў раёне 45 непрацаздольным жыхарам уразлівай катэгорыі насельніцтва, якія апынуліся ў цяжкай жыццёвай сітуацыі, для забеспячэння бяспечных умоў пражывання аказана матэрыяльная падтрымка на суму амаль 11 500 рублёў. Прадастаўлены і іншыя формы падтрымкі насельніцтва.
Іерэй ляхавіцкага храма Узвіжання Крыжа Гасподняга Максім Доўгі адзначыў, што жыццё – вялікая каштоўнасць, і кожны абавязаны цаніць яе і надаваць вялікую ўвагу бяспецы, быць разважлівым і пільным. Агучаныя прафілактычныя пытанні ўзмацнілі і замацавалі інтэрактыўныя пляцоўкі з удзелам валанцёраў раённай арганізацыі Беларускага Таварыства Чырвонага Крыжа, Асвода, РАНС і іншых. У праграме прадстаўлены аварыйна-выратавальная тэхніка РАНС, Ляхавіцкага раёна газазабеспячэння і раёна электрасетак, хуткая меддапамога, былі і паказальныя выступленні выратавальнікаў з дэманстрацыяй магчымасцяў сучаснага абсталявання.
А ў падарунак – выдатная канцэртная праграма ў выкананні арт-групы «А.Л.О» і цудоўны танец гурткоўцаў Падлескага СДК.

Наталля ПЕРАПЕЧКА.
Фота аўтара.