Старшыня Ляхавіцкага райсавета дэтутатаў: «Ініцыятыва – гэта людзі! Сёння нашы старасты, дэпутаты маюць аўтарытэт і давер у сваіх вёсках і акругах, таму могуць аб’яднаць на добрую справу людзей»

На мінулым тыдні адбылося пашыранае пасяджэнне Прэзідыума Савета Рэспублікі. У цэнтры ўвагі – роля дэпутацкага корпуса ў рэалізацыі задач, пастаўленых Кіраўніком дзяржавы па навядзенні парадку на зямлі і добраўпарадкаванні тэрыторый.

Бясспрэчна, наша краіна – эталон гаспадарскіх адносін да зямлі, і гэтаму маленькіх беларусаў прывучаюць з дзяцінства. Гэта як неад’емная частка нашага культурнага кода – жыць у прыгажосці, трымаць у парадку месца, што стала домам.
– Як неаднаразова падкрэсліваў Прэзідэнт Беларусі Аляксандр Лукашэнка, на зямлі павінен быць ідэальны парадак. Чысціня, эстэтыка – гэта не проста наш брэнд, гэта стыль жыцця і, урэшце,
гэта ж здароўе людзей. Менавіта таму Кіраўнік дзяржавы ўдзяляе такую ​​пільную ўвагу гэтай тэме, ставіць перад намі канкрэтныя задачы і патрабуе іх няўхільнага выканання, – адзначыла падчас пасяджэння старшыня Савета Рэспублікі Наталля Качанава.
Чысціня і парадак – паняцці зборныя, і гучаць больш абагульняюча. І кожны грамадзянін у падтрыманні прыгажосці –  не старонні назіральнік, а ўдзельнік агульнага сюжэту. І ў адзінстве такога погляду, як адзначыла спікер верхняй палаты Парламента, ключавая роля адводзіцца менавіта дэпутацкаму корпусу.

Старшыня раённага Савета дэпутатаў Юрый Чаранкевіч таксама прымаў удзел у пасяджэнні:
– Сапраўды, чысціня беларускіх гарадоў і вёсак – гэта ўжо складзены дзесяцігоддзямі брэнд. І тое, што так будзе і далей, сведчыць дзяржаўны клопат у гэтай сферы. Указам Прэзідэнта Рэспублікі Беларусь ад 3 студзеня 2025 года № 1 бягучы год аб’яўлены
Годам добраўпарадкавання. Гэта яшчэ раз падкрэслівае, што парадак у нашым доме будзе ладзіцца нашымі сіламі і па нашых правілах. Безумоўна, роля дэпутатаў розных узроўняў, асабліва ў сельскай мясцовасці – важкая, лічы, першачарговая. Сёння народныя абраннікі павінны не толькі чуць выбаршчыкаў і быць каталізатарам вырашэння надзённых пытанняў, важна ўлаўліваць загадзя гэтыя сітуацыі і акумуляваць людзей вакол іх вырашэння.
Прыемна, што на Ляхавіччыне механізм узаемадзеяння, лічы, адладжаны, а, галоўнае, дае плён. Грамадзянскія ініцыятывы даказалі сваю дзейнасць у справе. Напрыклад, сітуацыю з добраўпарадкаваннем могілак, якіх у раёне налічваецца 65 (знаходзяцца на балансе камунгаса), жыхары многіх населеных пунктаў вырашылі не пакідаць толькі на камунальнікаў. У любой
справе важны чалавек з актыўнай грамадзянскай пазіцыяй. Калі такі чалавек ёсць – стараста, напрыклад, – ён хутка дае старт для вырашэння праблемы. Менавіта грамадзянская ініцыятыва дапамагла, каб на могілках у Гуце і Куліках з’явілася жалезабетонная агароджа. Частку сродкаў сабралі неабыякавыя землякі, частку выдзеліў камунгас, які і займаўся ўстаноўкай. Акрамя таго, на такіх месцах за парадкам заўжды сочыць не толькі служба ЖКГ, але і самі жыхары становяцца арганізатарамі суботнікаў. Прыклад пайшоў у масы – цяпер такі праект рэалізуецца ў Рагачах. А ў Галаўнінцах выдаляць сухую расліннасць і кустоўе на могілках камунгасу дапамагаюць вяскоўцы. Хутка пачнуцца работы на могілках у Альхоўцах. Жыхары на чале са старастай і ініцыятыўнымі людзьмі пачалі збор сродкаў, каб укласціся ў агульную справу. На чарзе Ліпск, спадзяюся, і там падтрымаюць такую ж ідэю.
Як бы банальна ні гучала, але павінна быць ініцыятыва – а гэта людзі! Сёння нашы старасты, дэпутаты маюць аўтарытэт і давер у сваіх вёсках і акругах, таму могуць аб’яднаць на добрую справу людзей. Суботнікі і спантанныя добрыя справы для іх – не выпадковыя сюжэты! Людзі гатовы працаваць побач са сваімі акруговымі дэпутатамі і старшынямі сельвыканкамаў, давяраць ім праблемы, калі будуць бачыць вынік. Сёння ў нас досыць прыкладаў, калі рознага роду вясковыя нязручнасці ў плане добраўпарадкавання ператвараліся ў станоўчыя прыклады. З’явіўся прыпыначны пункт у Малым Гарадзішчы, добраўпарадкаваны прыпынкі па патрабаванні ў Галаўнінцах і Тухавічах, вырашаны незразумеласці па пракладцы водаправода ў Малым Гарадзішчы і г. д. І гэта дзякуючы супраўніцтву зацікаўленых службаў і дэпутатаў розных узроўняў. Дарэчы, падчас сходаў па вырашэнні пытанняў мясцовага значэння людзі не аднойчы дзякавалі за працу сваім народным абраннікам.

І, канешне, немагчыма не сказаць пра грамадзянскую ініцыятыву, якая ўжо знайшла рэалізацыю ў вёсцы Марынова. Уздоўж дарогі Р-43
з’явіўся памятны знак спаленым у гады Вялікай Айчыннай вайны вёскам. І за ім стаяць нашы неабыякавыя землякі: і матэрыяльна ўклаліся, а колькі суботнікаў і працоўных дэсантаў ініцыявалі там дэпутаты, старшыні сельвыканкамаў. І, што самае галоўнае, прыцягнулі да справы моладзь.
Таму ў Год добраўпарадкавання нашы справы і памкненні павінны загучаць яшчэ мацней! І ініцыятывы ў нашых землякоў ужо ёсць.

Маргарыта
КУХТА-МАСЛОЎСКАЯ.