Кошт «залатых» гор і пустых абяцанняў. Як жыхары Ляхавіччыны трапляюць на вуду зламыснікаў і губляюць грошы

Ляхавічанка 1988 г. н. на адной з гандлёвых інтэрнэт-пляцовак вырашыла купіць кветкі. Перавяла перадаплату ў суме 180 рублёў, а ў выніку – ні тавару, ні грошай. Падобная сітуацыя здарылася і з ляхавічанінам 2003 г. н., які вёў перапіску ў месанджары з мэтай дастаўкі яму кветак. Пасля пераводу 140 рублёў авансу прадавец перастаў выходзіць на сувязь.

Жыхар Мінскай вобласці 1988 г. н. знаходзіўся ў нашым райцэнтры ў сваякоў. Убачыў у інтэрнэце аб’яву пра аўтамабіль па прымальных кошце і тэхнічным стане. Прадавец абмовіўся, што калі аматар аўто жадае быць сярод пакупнікоў першым, то няхай перавядзе
перадаплату. Што той і зрабіў. Але радаваўся рана – адрас аказаўся фіктыўным, і пра машыну там ніхто не ведаў. Сума страты – больш за
4 700 рублёў.

Ляхавічанка недалічылася ў сямейным бюджэце 1 400 рублёў пасля таго, як трапіла на вуду телефоннага «добразычліўца». Жыхарцы райцэнтра 1950 г. н. невя-домы прадставіўся супрацоўнікам праваахоўных органаў і прапанаваў задэклараваць грошы, якія ў яе маюцца. Інакш, маўляў, давядзецца плаціць на свае сродкі падатак. Пенсіянерка павялася на прапанову і спачатку залічыла на свой рахунак 1 400 рублёў, а пасля перавяла іх па прапанаваных рэквізітах.
Па ўсіх выпадках РАСК узбудзіў крымінальныя справы, праводзіцца расследаванне.

Каб не страціць свае грошы і не стаць ахвярай тэлефонных зламыснікаў, не варта весціся на іх перакананні, пераводзіць грошы авансам. Не трэба пераходзіць па гіперспасылках, дасланых невядомым адпраўшчыкам. Калі ўсё ж націснулі на спасылку, то ў выпадку завісання ці іншай падазронай актыўнасці камп’ютара варта адразу адключыць яго ад інтэрнэту. Пры анлайн-продажы тавару памятайце, што для правядзення плацяжу пакупніку дастаткова ведаць нумар карты прадаўца. Ні ў якім разе не паведамляйце яму код CVC, які знаходзіцца на адваротным боку пластыкавай карткі. Пры куплі тавараў у інтэрнэт-магазінах абавязкова трэба праверыць адрас рэсурсу, на які зайшлі. Зламыснікі робяць падобныя па дызайне сайты – фішынгавыя, якія могуць адрознівацца ад арыгінала ўсяго адной літарай у назве.

Аляксандр ТРАЯНОЎСКІ, начальнік РАСК.