Дасягненні – у залік. Планы – на рэалізацыю. Рабочая паездка першага намесніка старшыні Брэсцкага аблвыканкама Дзмітрыя Гарадзецкага ў Ляхавіцкі раён пачалася з наведвання ААТ «Ляхавіцкі льнозавод»

Дзмітрый Гарадзецкі пазнаёміўся з вытворчым працэсам перапрацоўкі сыравіны ў ільновалакно, матэрыяльна-тэхнічнай базай і фінансава-эканамічнымі паказчыкамі прадпрыемства. Таксама першы намеснік губернатара Брэстчыны пабываў на заводскіх палетках каля вёскі Набярэжнай, дзе ішла сяўба даўгунцу. Сярод першачарговых задач, пастаўленых Дзмітрыем Гарадзецкім перад кіраўніцтвам завода, – павышэнне эфектыўнасці вытворчасці і якасці прадукцыі.

Напярэдадні прайшоў сход акцыянераў Ляхавіцкага льнозавода, дзе былі падве-дзены, у тым ліку, вынікі фінансава-гаспадарчай дзей-насці прадпрыемства за 2024 год і акрэслены асноўныя задачы на сёлета.
Дырэктар прадпрыемства Дзмітрый Скакун падкрэсліў, што 2024 год стаў даволі-такі нядрэнным для завода.
Па-ранейшаму тут вырошчвалі лён, перапрацоўвалі льнотрасту, выпускалі тэхнічнае масла, сярод прадукцыі – і паліўныя брыкеты, падсцілачны матэрыял, макуха. А пачынаючы з мая 2024 года ў межах рэспубліканскай ініцыятывы «Адзін раён – адзін праект» асвоілі выпуск інавацыйнай прадукцыі – катанізаванага льновалакна. У асноўным яно рэалізоўвалася на экспарт у Кітай. Дарэчы, днямі льнозавод заключыў дагавор на пастаўку пробнай партыі катанізаванага льновалакна ў Турцыю.
Летась на заводзе выраблена 2 888 тон ільновалакна. І гэта яшчэ адзін крок да вытворчай планкі, якую мараць дасягнуць завадчане – выпрацаваць за год 3 000 тон ільновалакна. Але ў, здавалася б, добрых лічбах ёсць і істотны мінус. Значна ўпала вытворчасць доўгага валакна – асноўнага стратэгічнага льно-заводскага прадукту. На прад-прыемстве бачаць неабход-насць у больш якасным насенні льну. І пэўныя зрухі ў гэтым напрамку ўжо ёсць. Сёлета набыты 60 тон насення сорту «рубеж» і 15 тон – «эдэн». Яны добра зарэкамендавалі сябе летась. У 2026 годзе элітнага насення плануецца набыць яшчэ больш.
Сярод важных здабыт-каў мінулага года дырэктар прадпрыемства назваў набыццё дэзынтэгратара. Дзякуючы гэтай машыне для драблення малаабразіўных матэрыялаў ўся няякасная льнотраста, што захоўвалася ў шохах, перапрацавана ў валакно для атрымання катаніну.
Гаварыў Дзмітрый Скакун і пра выручку. Пры гэтым падкрэсліў: калі б завод у месяц выпускаў не 40 тон доўгага льновалакна, а
100 тон, то выручка вырасла б на 50–60 працэнтаў. Адпаведна, можна было б набыць больш тэхнікі, абсталявання, павялі-чылася б і зарплата.
Прыемна для завадчан было пачуць, што летась прадпрыемства спрацавала прыбыткова – у гэтым заслуга кожнага. Расце і заработная плата. Чым не падстава для гонару і наступная акалічнасць: згодна з рэйтынгам Аршанскага льнокамбіната, сярод 19 ільнозаводаў Беларусі прадпрыемства ў Задвор’і займае пятае месца.
Агучаны і планы на 2025 год. Гэта і набыццё новай тэхнікі, і замена абсталявання. Некаторыя з планаў ужо ў дзеянні. Пачаліся работы па ўстаноўцы «цыклонаў» для больш якаснай вентыляцыі. Клапоціцца прадпрыемства і пра наяўнасць уласнага жылля для тутэйшых работнікаў. Першыя крокі зроблены. У былым Задворскім дзіцячым садку, які перададзены льнозаводу, уладкаваны міні-інтэрнат на 10–12 чалавек, а таксама дзве службовыя кватэры для завадчан.

Галіна КАНЬКО.

Фота Сяргея ВАРАНОВІЧА.