Расці вялікі! Ляхавіцкі раён прыступіў да сяўбы льну

Па стане на пачатак учарашняга дня, Ляхавіцкі льнозавод адсеяўся прыкладна на шасці сотнях гектараў.

А свой першы ў гэтым годзе пасяўны круг работнікі аграмеханізаванага атрада прадпрыемства зрабілі тыдзень назад. Засеяныя 26 сакавіка дзясяткі гектараў палёў, размешчаных на блізкім ад завода гарызонце, далі старт доўгаму і клапатліваму сельскагаспадарчаму сезону.
Усе ворыўныя работы прадпрыемства завяршыла восенню, што, канешне ж, вельмі добра. Але недастаткова.
– Спачатку пускаем культыватар у якасці агрэгата для закрыцця вільгаці. Другім нумарам выступае апарат па ўнясенні азотнага ўдабрэння ў вадкай фракцыі – усе астатнія віды тукаў палі атрымалі яшчэ «пад ворыва». Падрыхтоўку плошчаў завяршае агрэгат камбінаваны шыроказахватны – АКШ. Лён – гэта дробнанасенная культура, якая патрабуе найбольш «роўнай» падрыхтоўкі глебы, – тлумачыць перадпасяўную тэхналогію вядучы аграном ААТ «Ляхавіцкі льнозавод» Мікалай Герасімовіч.

Для правядзення завяршальнай аперацыі на добра падрыхтаваны палетак ільнозавод гатовы вывесці да пяці адзінак пасяўной тэхнікі: чатыры простыя, калі так можна казаць, сеялкі і комплексны пасяўны агрэгат.
Рэжым рабочага дня – ненармаваны. Але ж у гэтай клапатлівай занятасці льнозавод не арыгінал, у падобным раскладзе ў гэтыя
веснавыя дні працуюць усе аграрыі.
У бягучым годзе на больш як 2 000-гектарным ільнопалетку льнозавода будзе размешчана шэсць сартоў даўгунцу. Пераважна айчыннай селекцыі «грант». Але сельскагаспадарчай тактыкай ільнозавода з’яўляецца штогадовае сортаабнаўленне з павышэннем стадыі рэпрадукцыйнасці насеннага матэрыялу.
– Сёлета частку плошчаў адводзім пад элітнае насенне сорту «рубеж». Будуць таксама гектары з замежным «эдэнам».
Усяго разам 700 гектараў, што складзе прыкладна трэцюю частку ўсіх нашых ільнопасеваў, – падвёў рысу пад гутаркай Мікалай Герасімовіч.

Іван КАВАЛЕНКА. Фота Сяргея ВАРАНОВІЧА.