Парадак сам не навядзецца. Жыхары Ляхавіцкага раёна ўключаюцца ў справу агульнай важнасці

Месячнік па прыбіранні, добраўпарадкаванні і азеляненні двароў, вуліц, сквераў, паркаў, зоны адпачынку і іншых аб’ектаў сацыяльна-бытавога і культурнага прызначэння праходзіць у Ляхавіцкім раёне.

Землякі ўключаюцца ў справу агульнай важнасці. З кожным днём становіцца усё больш адрасоў, ахопленых «чыстай увагай». Але ёсць і такія гора-гаспадары, якія не толькі не пачалі пасля зімы ўладкоўваць замацаваную тэрыторыю, але і забыліся, калі наогул гэта рабілі.

Высветліць, наколькі актыўна землякі далучаюцца да навядзення парадку – такую мэту ставілі перад сабою супрацоўнікі аддзелаў архітэктуры, будаўніцтва і ЖКГ, землеўпарадкавання райвыканкама, карэспандэнт «ЛВ» падчас рэйду на мінулым тыдні. Дарэчы, пры райвыканкаме створана рабочая група, якая маніторыць, як праходзіць месячнік чысціні ў раёне.
Першай у поле зроку рэйдавай групы трапіла прыватная забудова райцэнтра. Большасць ляхавічан падтрымлівае дваровыя тэрыторыі і прысядзібныя ўчасткі ў парадку. Але, як паказвае практыка, не ўсе.
– Амаль на кожнай вуліцы райцэнтра сустрэнеш адрасы, куды адпраўляюцца прадпісанні аб неабходнасці прыбрацца на замацаванай тэрыторыі вакол прыватнага дома. Ёсць тыя, хто прыслухоўваецца да патрабаванняў і выпраўляе сітуацыю, але сустракаюцца і такія, хто мяняць нічога ў лепшы бок і не збіраецца. У такіх выпадках выносіцца пытанне аб адабранні прадастаў-леных зямельных участкаў, – адзначае начальнік аддзела землеўпарадкавання райвыканкама Наталля Крымская.
За прыкладам такой безгас-падарчасці доўга ехаць не прый-шлося – адзін з участкаў па вуліцы Маладзёжнай (фота 3) не толькі выглядае неахайна, але і псуе даволі-такі ўладкаваную карціну ўсёй вуліцы. Каля рэшткаў агароджы і з боку вуліцы, і ўнутры ўчастка ўсё зарасло хмызняком. З-за зараснікаў амаль не відаць недагледжаных, паўразбураных пабудоў. Дарэчы, як патлумачыў галоўны спецыяліст аддзела землеўпарадкавання Уладзімір Стыкуць, гэты ўчастак быў вы-дзелены грамадзяніну ў 2009 годзе для будаўніцтва і абслугоўвання дома. Але работы так і не вядуцца да сёння. Прадпісанні навесці парадак застаюцца непачутымі.
Яшчэ адзін участак з такой адзнакай безгаспадарчасці знаходзіцца на вуліцы Савецкай (фота 2). З пэўнай перыядычнасцю на працягу апошняга дзесяцігоддзя тут калі-нікалі рабіліся кволыя спробы выправіць сітуацыю, але запалу хапала не надоўга, а тэрыторыя зноў загрувашчвалася. Вось і на мінулым тыдні «пейзаж» не змяніўся. Па ўсім перыметры ўчастка раскватараваліся смецце, хмызняк, часткі аўтамабіляў, цэгла, рэшткі мэблі і шмат чаго іншага. Спатрэбіцца не адзін дзясятак прычэпаў, каб усё гэта вывезці. Гаспадар дома расказаў, што стараецца прыбраць тэрыторыю, але не хапае часу і сіл. Зразумела, што за дзень і нават тыдзень парадак у такім запусценні не навядзеш. Але ж справа ў тым, што горы смецця выраслі не за месяц ці год. Чаму гаспадарскае сумленне ўвесь гэты час спакойна адпачывала? Наталля Крымская падкрэсліла, што выдадзена прадпісанне гаспадару дома да 1 красавіка гэтага года навесці парадак.

Акуратна, чыста, добраўпарадкавана. Прычым відавочна, што гаспадарскі падыход тут на пастаяннай аснове, а не час ад часу – станоўчы прыклад для пераймання. Гэта пра тэрыторыю Ляхавіцкага раёна электрасетак (фота 1).
– У плане навядзення парадку да РЭС амаль што не ўзнікае прэтэнзій. Камфорту і чысціні тут заўжды надаецца належная ўвага. Тутэйшыя работнікі клапоцяцца пра парадак. Але трэба пераглядзець графікі і, магчыма, часцей удзяляць увагу падкошванню і прыбіранню смецця каля трансфарматарных падстанцый і пад лініямі электраперадачы, – тлумачыць галоўны спецыяліст аддзела архітэктуры, будаўніцтва і ЖКГ Наталля Маслоўская.

З першага позірку ў парадку з парадкам на тэрыторыі ПМК-13 (фота 5). А калі прайсціся па ёй, то недапрацоўкі сустракаюцца, прычым не адзінкавыя. Кіраўніцтва арганізацыі запэўніла, што
работы па добраўпарадкаванні прадоўжацца. Напрыклад, зараз ідзе вываз металалому з пляцоўкі па зборы другасных матэрыяльных рэсурсаў. Дарэчы, на гэты раз не выклікала пытанняў і тэрыторыя воданапорнай вежы, якая знаходзіцца на балансе ПМК-13.
З кожным рэйдам ці маніторынгам па чысціні ўсё больш і больш станоўчых змяненняў на тэрыторыях большасці прадпрыемстваў рознай формы ўласнасці, адрасы якіх знаходзяцца на вуліцы Працоўнай. Аднак тут яшчэ ёсць арганізацыі, што так і не зрабілі работу над памылкамі ў плане добраўпарадкавання. Напрыклад, значна менш прэтэнзій у спецыялістаў землеўпа-радкавальнай службы, аддзела архітэктуры, будаўніцтва і ЖКГ да ІП Цельпука. Разам з тым, па-ранейшаму на тым жа месцы, як і мінулым летам, стаіць прычэп, запоўнены зношанымі шынамі (фота 4). Можа пара прыбрацца, а шыны адправіць у якасці другаснай сыравіны на перапрацоўку?
Станоўчыя змяненні зафікса-ваны на тэрыторыі ПВУП «Ляха-вічыбудтранс»: прыбраліся старанна – няма прэтэнзій. Толькі плюсы – гэта пра стан тэрыторыі ТАА «Ібіра».
Зноў пытанні да парадку ў адносінах да ПВГУП «Цвірко і К»: агароджа па перыметры тэрыторыі па вуліцы Вакзальнай патрабуе рамонту, ды і ў вэрхала з дошак ёсць усе шанцы разваліцца і прывесці да няшчаснага выпадку.
Рэйды і маніторынгі будуць прадаўжацца. Хочацца спа-дзявацца, што адрасоў чыстых спраў будзе значна больш, чым адмоўных прыкладаў. Бо наша мэта агульная – зрабіць Ляхавіччыну яшчэ больш прыгожай і ўтульнай.

Галіна КАНЬКО.
Фота аўтара.