Культуры многа не бывае

З пададзеных да «Вялікай размовы з Прэзідэнтам» 57 пытанняў ад жыхароў Брэсцкага рэгіёна на кантролі засталіся два, паведаміў пасля прыёму грамадзян у Драгічыне памочнік Прэзідэнта – інспектар па Брэсцкай вобласці Анатолій Маркевіч. Ён падкрэсліў, што адказы па большасці зададзеных пытанняў людзі ўжо атрымалі, а ў бліжэйшы час будуць праінфармаваны і па астатніх.
Частка пытанняў, што паступілі з нашага раёна падчас «Вялікай размовы», датычыла культурнай тэматыкі: чаму работу клубаў і СДК ацэньваюць, у першую чаргу, па выкананні плана платных паслуг, чым абумоўлена тэндэнцыя закрыцця ўстаноў культуры ў сельскай мясцовасці, і дзе праводзіць вольны час вясковым школьнікам і моладзі?
Сярод галоўных задач устаноў культуры арганізацыя вольнага часу і адпачынку насельніцтва. Культработнікі далучаюць землякоў да народных традыцый і свету прыгожага, спрыяюць іх культурнаму росту, дапамагаюць развіваць здольнасці і задавальняць культурныя патрэбы. Начальнік аддзела ідэалагічнай работы, культуры і па справах моладзі райвыканкама Ніна Прыхач прыгадала, што гэтая работа ацэньваецца па многіх паказчыках, і колькасць аказаных платных паслуг далёка не галоўнае. Тым не менш, трэба прызнаць, што для бюджэтнай сферы аспект даволі важны: заробленае накіроўваецца на паляпшэнне матэрыяльнай базы клубаў і СДК, што, у сваю чаргу, дае магчымасць працаваць больш эфектыўна, творча і вынікова. І, безумоўна, цікава. Хіба не гэтага усе чакаюць ад устаноў культуры?
Не сакрэт, што колькасць насельніцтва, асабліва вясковага, змяншаецца. Часам бывае, што ў бібліятэкі, клубы, Дамы культуры за тыдзень прыходзяць лічаныя наведвальнікі. І справа нават не ў зарплаце культработніка. Будынак усю зіму ацяпляецца, круглы год павінен быць чысты, прыгожы, дагледжаны…
З мэтай эканоміі бюджэтных сродкаў праводзіцца рэарганізацыя і аптымізацыя сеткі ўстаноў культуры. Ужо сёлета перасталі працаваць клубы і бібліятэкі ў Сваятычах і Альхоўцах, клуб у Зубелевічах. Ніна Прыхач расказала, што такія меры дазволяць зэканоміць каля 53 тысяч рублёў, каб выкарыстаць іх максімальна рацыянальна – там, дзе яны прынясуць большую карысць.
Напрыклад, дапамогуць наладзіць работу мабільных устаноў культуры – аўтаклуба і бібліёбуса, што па графіку курсіруюць па вёсках, у якіх няма стацыянарных устаноў культуры. Летась на маршруце было адпаведна 45 і 18 населеных пунктаў. Як запэўнілі ў аддзеле ідэалагічнай работы, культуры і па справах моладзі райвыканкама, сёлета зона ахопу выязной культурнай увагай пашырыцца, а формы абслугоўвання стануць больш разнастайнымі (напрыклад, за кошт арганізацыі майстар-класаў і выстаў-продажаў работ народных умельцаў), штомесяц плануюцца выязныя канцэрты ў 20 вёсках. Літаральна днямі аўтаклуб і бібліёбус сустракалі ў Гайнінцы. А сёння, згодна графіка, такая культурная сустрэча чакае жыхароў Зубелевічаў і Канюхоў. Акрамя таго, у аддзеле праінфармавалі: вёскі, дзе няма ўстаноў культуры, будуць абслугоўвацца суседнімі СДК і клубамі.
Аналізуючы работу са зваротамі, памочнік Прэзідэнта – інспектар па Брэсцкай вобласці Анатолій Маркевіч адзначыў, што ў любой сітуацыі ёсць варыянты вырашэння праблемы, трэба толькі захацець іх знайсці.  
Святлана БЕЛЬМАЧ.