Гэта мы зрабілі! На Ляхавіччыне пасуботнічалі /фота/
На пытанне, што для вас суботнік, і зямляк-ветэран, і юная ляхавічанка адказалі амаль слова ў слова: справа гонару, традыцыя, магчымасць адчуць сваё актыўнае дачыненне да вельмі карыснага, прыгожага, выніковага, патрэбнага дзеяння. Сапраўды, у ім, гэтым дзеянні, мы разам у добрым памкненні. Колькі ж канкрэтных ”суботнікаўскіх” адрасоў, так бы мовіць, дакладных каардынат нашай нераўнадушнасці, у пэўнай ступені дабрачыннасці ўжо ўтварылі геаграфію практычнага саўдзелу ў справах на карысць (не бойцеся гучных слоў!) агульную – краіны і кожнай сям’і, кожнага чалавека.
Вось і субота, 22 красавіка 2017 года, дабавіла старонак у рукастваральны сюжэт, назва якога – суботнік. Ён адбыўся. Дружны, шматколькасны і чакана радасны. Так, часам трохі дажджыла, было ветрана, але, як кажуць, хто хоча працаваць – той працуе. На Ляхавіччыне больш за 8 з паловай тысяч чалавек прынялі ўдзел у рабочай ”чырвонай” субоце. Шмат пашчыравалі на добраўпарадкаванні горада і вёсак. ДРБУ № 200, напрыклад, наводзіла парадак абапал дарогі Ляхавічы-Грушаўка, а адна з брыгад ад Ляхавіцкага дзяржаўнага аграрнага каледжа – у напрамку Каменкі. Лясгас убіраў аварыйныя дрэвы непадалёку ад аздараўленчага лагера ”Чайка”, дзе напярэдадні чысціню наводзілі работнікі аддзела адукацыі спорту і турызму райвыканкама. Прадпрыемства меліярацыйных сістэм знайшло куды прыкласці сілы: ля гарадской крынічкі і далей уздоўж ракі Ведзьма распраўляліся са смеццем і непатрэбнымі зараснікамі, а яшчэ рабілі генеральную ўборку на сваёй тэрыторыі і ля дамбы ў вёсцы Кулікі.
З 10 гадзін раніцы 22 красавіка, як толькі закончыўся праліўны дождж, літаральна на вачах пачала абнаўляцца, добраўпарадкавацца і тэрыторыя паркавага ансамбля “Рэпіхава”. Педагогі і вучні Крывошынскай сярэдняй школы, работнікі лячэбна-вытворчых майстэрняў, “Свяціцадрэў”, пажарныя-выратавальнікі Ліпскага ПАВП, дэпутаты Крывошынскага сельсавета, у дапамогу ім – бензапілы, сякеры, граблі, лапаты, трактары, машыны. Настрой, у адрозненне ад надвор’я, быў радасны і бадзёры. Работы хапіла ўсім: спілоўвалі аварыйныя дрэвы, збіралі сушняк, ачышчалі тэрыторыю ад смецця.
– Мы з аднакласнікамі часта прыходзім у парк прыбірацца. Але сёння асаблівая атмасфера: хоць і працуем, – а нібы свята. Напэўна таму, што чысціню ствараем разам, – гаворыць адзінаццацікласніца Крывошынскай СШ Крысціна Кожыхава, якая разам з дзевяцікласніцай Насцяй Свянтэцкай збіралі сухія галінкі. Усе радаваліся, што дзякуючы ў тым ліку і іх намаганням адзін з прыгожых куточкаў Ляхавіччыны стане святлей і ўтульней.
– Хочам ператварыць наша Рэпіхава ў востраў чысціні, выграбаем “дабро”, якое за зіму тут назбіралася. Канешне, работы многа, але нічога, справімся, – задорна запэўніла дэпутат Крывошынскага сельсавета, стараста вёскі Заліпенне Валянціна Дыдышка.
Кожны з удзельнікаў суботніка, у тым ліку і тыя, хто ў гэты дзень выходзіў на сваё працоўнае месца, можа з чыстым сумленнем сказаць: гэта мы зрабілі!
Вольга БАРАДЗІНА,
Святлана БЕЛЬМАЧ,
Галіна КАНЬКО.
Фота Сяргея ВАРАНОВІЧА.
