Ляховичи: приглашаем в кафе «Калі ласка»

Гаспадыня кафэ Наталля Лойка: "Мы рады бачыць у ”Калі ласка” і дзяцей, і дарослых"

«Калі ласка” – так шчыра запрашае кафэ з аднайменнай назвай, што знаходзіцца ў цэнтры Ляхавіч. Запрашае з дырэктарам ПГУП “Арт-Наталі” Наталляй Лойка ўжо на працягу 4 гадоў. Упэўнена зроблены важныя крокі па заваяванні фірменнай кухняй густаў не толькі землякоў, але і гасцей з суседніх раёнаў.

Пісьменнік Андрэй Платонаў пазначаў у сваіх запісах: «Мастацтва заключаецца ў тым, каб з дапамогай найпрасцейшых сродкаў выказаць складанае». Гасцінны калектыў кафэ простым і ветлівым абслугоўваннем запрашае на адпачынак у свет разнастайна-прыемных смакавых адчуванняў. Вытанчаныя і смачныя салаты і закускі, халодныя і гарачыя стравы, гарніры, напіткі і дэсерты даспадобы самым прыдзірлівым гурманам. Асаблівае месца ў меню — стравам беларускай кухні. Тут падаюць “Важэцкі далікатэс”, дранікі з рознай начынкай, мачанку і г.д.

Фішка ўстановы — фірменная страва “Эль-патэльня”.

— Многае з меню кафэ прыдумана мною асабіста ці падгледжана і адаптавана, — дзеліцца сакрэтамі паспяховасці гаспадыня кафэ. — Так было і з фірменнай стравай. Падчас падарожжа па Швейцарыі пакаштавала смакату з рысу, гародніны і печані. Вярнулася дадому і ўзнік беларускі варыянт – “Эль-патэльня”, у аснове якога замест рысу – бульба, а калі хто не вельмі любіць печань — дамашняя каўбаса.

Робіць кафэ яшчэ больш прыцягальным наяўнасць вялікага тэлевізара, караоке, магчымасць разліку банкаўскай карткай. Козыр установы — “жывы” гук і вопытны ды-джэй. Для стварэння атмасферы добрага і рамантычнага настрою гэта надзвычай важна.

Ва ўтульным інтэр’еры кафэ можна смачна і сытна паабедаць, адзначыць урачыстасць ці іншую падзею, правесці цікава час з сябрамі ці проста адпачыць. Для тых, хто не любіць шумных кампаній, ёсць міні-банкетная зала.

Асобная размова – пра абедзеннае меню, якое распрацоўваецца кожны дзень, вызначаецца разнастайнасцю і карыснасцю.

Для дзяцей наведванне кафэ — адметная падзея. Таму, па словах Наталлі Лойка, для правядзення дзіцячых святаў прапануецца гульнявая праграма з удзелам клоунаў і іншае.

Склаліся ў “Калі ласка” свае традыцыі святкавання Новага года, Дня жанчын. У планах — рэканструкцыя і пашырэнне памяшкання да 80 пасадачных месцаў.

У кафэ “Калі ласка” любяць і цэняць кожнага кліента як самага жаданага госця і прапаноўваюць толькі самае лепшае, улічваючы яго пажаданні і інтарэсы.

— Мы рады бачыць у ”Калі ласка” і дзяцей, і дарослых, — шчыра запрашае Наталля Лойка.

Наталля ПЕРАПЕЧКА.

Фота Сяргея ВАРАНОВІЧА.