Магазін з роднай назвай

Родны кут – гэта не толькі самае мілае і дарагое мястэчка на зямлі, куды імкнешся ў марах і думках. З нядаўняга часу пад гэтым брэндам  аб’яднаны гандлёвыя аб’екты спажыўкааперацыі. У нашым раёне ”па-роднаму” завуцца  69 магазінаў сістэмы. Але сёння райпо прапануе гандлёвае абслугоўванне не толькі ў стацыянарных гандлёвых кропках. Жыхары  маланаселеных вёсак прывыклі да сігнала, што абвяшчае прыезд  магазіна  на колах. 7 аўталавак раённага спажывецкага таварыства абслугоўваюць 75 вёсак Ляхавіччыны:  дастаўляюць  і прамысловыя тавары, і прадукты. Можна зрабіць заказ,  і вадзіцель-прадавец абавязкова  яго выканае ў наступны прыезд, дапаможа і дадому данесці. У глыбінцы  работнікі  райпо  не чужыя  людзі.   Стаў сваім для  вяскоўцаў і “гаспадар” аўталаўкі Андрэй Савва (на здымку), які ў гэтым статусе паўтара гады. Яго хваляць не нахваляцца  жыхары вёскі  Рамашкі.   Па словах першага намесніка старшыні праўлення райпо Уладзіміра Шырэя, усе аўталаўкі забяспечаны неабходным  халадзільным і гандлёвым абсталяваннем, а ўсе вадзіцелі-прадаўцы выконваюць даведзеныя па тавараабароце заданні. 8 пунктаў грамадскага харчавання – рэстаран ”Ластаўка”,     кафэ “Алеся” і ”Смайлік”, кулінарыя ”Ласунак” і іншыя – таксама частка тутэйшага райпо.Гандлёвыя кропкі спажыўтаварыства рознымі спосабамі  імкнуцца прыцягнуць увагу пакупнікоў. Канешне, ім ёсць над чым працаваць, канкурэнцыя не дае спыніцца ў развіцці і ўдасканаленні. Звычайная справа для сённяшніх райпоўскіх магазінаў –  шматлікія  акцыі. Гандлёвыя  аб’екты рэканструююцца,  пашыраецца асартымент тавараў, ідзе пошук новых  формаў  абслугоўвання. Палаткі са знаёмым лагатыпам на рыначнай плошчы з вясны да позняй восені (пакуль дазваляюць тэмпературныя параметры) зазываюць пакупнікоў садавінай-агароднінай, мяснымі паўфабрыкатамі, хлебабулачнымі вырабамі, прамысловымі таварамі і многім іншым. Новы аўтафургон для развозкі хлеба дазваляе даставіць яго ў магазіны райцэнтра гарачым. Ляхавічане паспелі ацаніць  смачны сэрвіс ад райпо і зараз у чаканні навінак. Няхай яны не затрымліваюцца.