Золата! Серабро! Бронза!
Уладзіслаў Ганчароў
Раніцу мінулага аўторка беларуская каманда ў Рыа сустрэла з пятым алімпійскім медалём. Бронзу ў нашу скарбонку паклаў барэц грэка-рымскага стылю Джавід Гамзатаў.
Яшчэ раней на вышэйшую прыступку алімпійскага п’едэстала ўзнімаўся Уладзіслаў Ганчароў, які заваяваў золата ў скачках на батуце. Алімпійскі дэбютант бліскуча абышоў сваіх канкурэнтаў і прынёс Беларусі першы залаты медаль у Рыа-дэ-Жанэйра.
Два сярэбраныя медалі ў актыве цяжкаатлетаў Дар’і Навумавай (менавіта яна адкрыла медальны лік нашай каманды) і Вадзіма Стральцова. А плыўчыха Аляксандра Герасіменя стала бронзавым прызёрам на сваёй кароннай дыстанцыі 50 метраў вольным стылем.
З перамогамі спартсменаў павіншаваў Прэзідэнт Беларусі Аляксандр Лукашэнка, падзякаваў ім за спартыўнае майстэрства і пажадаў новых яркіх перамог.
Магчыма, не ўсё складваецца так, як планавалі ў трэнерскіх штабах і як хацелася б беларускім балельшчыкам. Не ўсе алімпійскія надзеі спраўдзіліся. Але Гульні ў Рыа пацвердзілі, што беларусы могуць і павінны ўваходзіць у спартыўную эліту. Чацвёртыя, пятыя, шостыя месцы – вельмі блізка да п’едэстала.
І падставы спадзявацца на тое, што медальная скарбонка нашай каманды яшчэ пацяжэе, – ёсць. А, магчыма, на сённяшні дзень гэтыя спадзяванні ўжо набылі рэальнае ўвасабленне.
Дарэчы, нашы пераможцы па традыцыі ўжо зрабілі свой “Алімпійскі выбар” – вызначылі дзіцяча-юнацкія спартыўныя школы для аказання спонсарскай дапамогі ад Прэзідэнцкага спартыўнага клуба. Хто ведае, магчыма, менавіта гэтыя перамогі і гэтая падтрымка стануць важкім штуршком для нараджэння новых алімпійскіх зорак Беларусі.
Фота БЕЛТА.
Дар'я Навумава
Вадзім Стральцоў
Аляксандра Герасіменя
Джавід Гамзатаў
