Падзяліся часцінкай сябе
Сёння ў Брэсцкай вобласці стартуе інфармацыйна-адукацыйная акцыя, прымеркаваная да Сусветнага дня донара крыві. Дата 14 чэрвеня шмат гадоў аб’ядноўвае людзей, нераўнадушных да чужой бяды. Яна прымеркавана да дня нараджэння аўстрыйскага ўрача Карла Ландштэйнера, якому за адкрыццё груп крыві чалавека ў 1930 годзе прысудзілі Нобелеўскую прэмію.Дэвіз акцыі – “Чым вы можаце дапамагчы? Здавайце кроў. Здавайце яе зараз. Здавайце яе часта” – прыцягвае ўвагу грамадскасці да значнасці і неабходнасці гэтай працэдуры. Будуць арганізаваны тэматычныя круглыя сталы, семінары, выязныя донарскія сесіі ў арганізацыях і ўстановах, дні бязвыплатнага донарства і многае іншае. Медыкі нагадаюць пра карысць здачы крыві, раскажуць пра захворванні крыві і г.д.
Многія і сёння лічаць, што здача крыві можа пашкодзіць іх здароўю. На самай справе, гэта не так. Забор крыві вядзецца пад кантролем урача аднаразовым інструментам. Для дарослага чалавека здача стандарт-най дозы крыві – 450 мілілітраў – не ўплывае адмоўна на самаадчуванне і фізіялагічныя працэсы. Наадварот, працэдура ўмацоўвае імунітэт і аздараўлівае арганізм у цэлым. Вучоныя высветлілі, што людзі, якія рэгулярна здаюць кроў, намнога радзей “сустракаюцца” з інфарктам, ішэмічнай хваробай сэрца.
Стаць донарам можа не кожны. Спачатку трэба прайсці дэталёвае ўрачэбнае абследаванне. Некаторыя адхіленні ў здароўі не дазваляюць здаваць кроў. Існуюць і абмежаванні па ўзросце: зялёнае святло даецца тым, каму ад 18 да 60 гадоў.
Сярод донараў ёсць такія, хто здае кроў бязвыплатна. І ў апошні час іх колькасць расце. З пачатку года да акцыі “Бязвыплатнае донарства пачынаецца з мяне” далучыліся 83 нашы землякі. Падчас яе чарговага этапу ў Жарабковіцкім ФАПе былі ўзяты 12 данацый крыві, сярод іх
3 рэдкай групы – трэцяй рэзус адмоўнай.
Медыкі запрашаюць сваіх землякоў прыняць удзел у акцыі, прымеркаванай да Сусветнага дня донара. Магчыма, ваша кроў можа выратаваць жыццё дзіцяці, запаліць іскру надзеі ў хворага.
Ірына ВОЛКАВА,
намеснік галоўнага ўрача ЦРБ.
