Здароўе пад мікраскопам

Загадчыца клініка-дыягнастычнай лабараторыі Галіна Сушко (у цэнтры) з калегамі ўрачом Таццянай Свінабурка, лабарантамі Алесяй Занько, Алай Мацкевіч, Вольгай Арлоўскай.

Для дакладнай пастаноўкі дыягназу і  назначэння правільнага  лячэння без лабараторных даследаванняў не абысціся. Лабараторная дыягностыка, як сцвярджаюць медыкі, забяспечвае 80 працэнтаў патрэбнай інфармацыі, неабходнай  для ацэнкі стану здароўя чалавека, вызначэння паталогіі.

У клініка-дыягнастычнай лабараторыі цэнтральнай раённай бальніцы  за месяц робяць да 60000 аналізаў. Сёлета за  5 месяцаў – 307595 агульнаклінічных, гематалагічных, біяхімічных і імуналагічных – для пацыентаў паліклінікі, стацыянара, прыёмнага пакою, падчас выязных медаглядаў.

28 гадоў  на чале гэтага надзвычай важнага падраздзялення Галіна Сушко – у сваёй справе ёй няма роўных. З хіміяй яны на ты яшчэ са школьных гадоў, а вучоба ў БДУ і любімая работа адшліфавалі веды і ўменні ўрача-лабаранта да ўзроўню высакакласнага прафесіянала. Яе надзейная каманда – 20 кваліфікаваных і кампетэнтных спецыялістаў, многія з якіх  працуюць не адно  дзесяцігоддзе. Для пацыентаў умеюць знайсці добрае, шчырае слова. Нельга ўявіць гэты калектыў і без урача лабараторнай дыягностыкі Таццяны Свінабурка. Старшы фельчар-лабарант Валянціна Абражэвіч у медыцыне 38 гадоў. Яны і іншыя шчодра дзеляцца вопытам з маладымі  спецыялістамі. Сяргей Бруцкі хоць працуе  першы год, Алеся Занько крыху больш – трэці, але ўвагу і  падтрымку калектыву  адчуваюць пастаянна. Яны і Людміла Свістун, Галіна Булдыга – фельчары-лабаранты палаты інтэнсіўнай тэрапіі. Гэта  так званая кругласутачная мабільная дапамога.

– У распараджэнні спецыялістаў нашай лабараторыі самае сучаснае абсталяванне, маюцца біяхімічны, гематалагічны аналізатары, гемакомп і іншыя навінкі, што дазваляе абследаваць хворых у дзень звароту, – расказвае Галіна Сушко. –  Нядаўна набыты прыбор для вызначэння анкалогіі прастаты і захворванняў шчытападобнай залозы, – адзначае загадчыца.

За кошт укаранення новых методык пашыраецца спектр даследаванняў. На новым абсталяванні экспрэс-тэсты дазваляюць вызначыць на самай ранняй стадыі ўзнікненне  інфаркту міякарда, сярэдні ўзровень глюкозы за апошнія 3 месяцы і інш.

Праца на сучаснай апаратуры патрабуе адпаведных ведаў і навыкаў. Таму работнікі лабараторыі пастаянна вучацца, удасканальваюць сваё майстэрства, удзельнічаюць у семінарах рознага ўзроўню, абменьваюцца вопытам.

– У наша жыццё прыходзіць радасць, калі ў нас ёсць любімы занятак, калі нас любяць і калі ёсць на што спадзявацца, – дзеліцца сакрэтамі жыццёвай падтрымкі Галіна Уладзіміраўна.