Крымінал. Здарэнні Ляхавіччыны

У Меляхах,  пакуль гаспадыня  адсутнічала дома, невядомыя дэманціравалі і ўкралі 60 лістоў металапрофілю з агароджы. Раённы аддзел Следчага камітэта ўзбудзіў крымінальную справу па частцы 1 артыкула 205 Крымінальнага кодэкса Рэспублікі Беларусь (крадзеж).

У Свяціцы з падворка знікла гумавая лодка коштам 400 рублёў.

Непрыемны сюрпрыз чакаў адну з пасажырак цягніка «Брэст-Віцебск». Ноччу пры пад’ездзе да станцыі «Ляхавічы» яна заўважыла прапажу тэлефона коштам 550 рублёў. Раённы аддзел Следчага камітэта ўзбудзіў крымінальную справу.

На закінутым участку каля вёскі Задвор’е супрацоўнікі міліцыі знайшлі і знішчылі 20 кілаграмаў маку.

У лясным масіве недалёка ад вёскі Мазуркі знойдзены павешаным 55-гадовы нідзе не працуючы мясцовы жыхар. РАСК праводзіць праверку.

У міліцыю за дапамогай звярнулася ляхавічанка: яе душыў муж. РАУС высвятляе прычыны і абставіны здарэння.

Увогуле з пачатку ліпеня ў раёне затрымана 20 сямейных скандалістаў, ёсць сярод іх і жанчына.

З 1 па 12 ліпеня 16 жыхароў раёна дастаўлены ў міліцыю  за знаходжанне ў грамадскіх месцах у нецвярозым стане, у тым ліку 3 жанчыны. Затрыманы 3 п’яныя вадзіцелі.

6 грамадзян учынілі дробныя хуліганствы.