Серафім у нашых сэрцах. Заступнік зямлі беларускай святы Серафім для жыхароў Ляхавіччыны – асоба не проста шаноўная – вельмі блізкая, зямляк
Раман Шахмуць (такое імя бацькі далі яму пры нараджэнні) з’явіўся на свет у Падлессі, вучыўся ў Ляхавічах. І з дзяцінства ведаў, што яго жыццёвы шлях – вера і дапамога людзям. Яму наканавана было стаць святым прападобнамучанікам Серафімам, архімандрытам Жыровіцкім.Днямі вернікі ўшаноўвалі 116-годдзе з дня нараджэння святога. Усе жадаючыя, незалежна ад веравызнання, змаглі прыняць удзел у духоўна-асветніцкім аўтамотапрабегу «Ад новапакутнікаў да вытокаў духоўнасці беларускага краю», арганізаваным праваслаўным ляхавіцкім брацтвам у гонар святога прападобнамучаніка Серафіма, архімандрыта Жыровіцкага і хрысціянскім адукацыйным цэнтрам імя святых Мяфодзія і Кірыла.
Хрэсны ход з іконай Божай Маці «Жыровіцкая» прайшоў з 14 па 16 ліпеня па мясцінах, звязаных з жыццём, духоўным станаўленнем і дзейнасцю святога Серафіма. Маршрут правёў удзельнікаў аўтапрабегу ад Успенскага Жыровіцкага манастыра да нашага райцэнтра, дзе вечарам у мінулую пятніцу каля памятнага знака «Капліца» на рыначнай плошчы сабраліся гараджане, каб паўдзельнічаць у малебне, пакланіцца абразу, прасіць у Божай Маці парады, дапамогі і падтрымкі. Благачынны цэркваў Ляхавіцкай акругі протаіерэй Георгій Жытко нагадаў пра жыццё і духоўны подзвіг прападобнамучаніка Серафіма.
У дзень нараджэння святога Серафіма святочная літургія адбылася ў храме Узвіжання Крыжа Гасподня ў Ляхавічах, у гэты ж дзень цудатворная ікона пабывала ў храме Святога Духа ў аграгарадку Падлессе.
Фота Сяргея ВАРАНОВІЧА.
