З жыцця “вадаплаўных”
Грымела, бліскала, ліло – стыхія прыйшла на Ляхавіччыну ў другой палове дня 25 ліпеня. Моцныя дажджы з навальніцай на некалькі гадзін амаль спынілі рух на вуліцах горада. Плылі рэдкія машыны, а адзінокія босыя пешаходы нават і не спрабавалі хавацца пад парасонамі – дарэмна.
Канешне, такое буйства стыхіі пакінула адчувальныя наступствы. Як паведамілі ў раённым аддзеле па надзвычайных сітуацыях, падтопленымі аказаліся некалькі дзясяткаў жылых дамоў і падворкаў у райцэнтры, Вялікай Лотве, Зубелевічах, Русінавічах, Патапавічах, іншых населеных пунктах.
Пашкоджанне разраднікаў у трансфарматарных падстанцыях стала прычынай адключэння ліній электраперадач на ўчастку Мінічы-Ганцавічы. Гэта па-шкоджанне работнікі раёна электрасетак ліквідавалі за 2 гадзіны. Яны ж хутка аднавілі падачу святла ў аграгарадкі Нача, Русінавічы, вёскі Тухавічы, Набярэжная, Петухоўшчына, Альхоўцы. Адключэнне электраэнергіі адбылося і ў востраўскай зоне. Тут было абясточана 19 трансфарматарных падстанцый, без электраэнергіі засталіся 6 населеных пунктаў, 203 дамы, малочнатаварныя фермы КСУП «Востраў-Агра» ў Востраве, Рагачах, Куліках. Праз 4 гадзіны сіламі Ляхавіцкага РЭС падача току на гэтым участку была адноўлена. Увогуле, па стане на 5 гадзін раніцы 26 ліпеня электраэнергія паступала ўсім спажыўцам.
Стыхія дабавіла работы камунальнікам, якія і цяпер працуюць у надзвычайным рэжыме. Пацёкшы дах, залітыя сцены, падтопленыя падвалы – «падарунак» непагадзі. У райцэнтры асабліва пацярпелі шматпавярховікі па вуліцы Будаўнікоў, завулку Южакова. Ад воднага патопу пацярпелі і падвальныя памяшканні жыллёва-будаўнічых спажывецкіх кааператываў па вуліцы Інтэрнацыянальнай і завулку Фестывальным у Ляхавічах.
Выратавальнікам давялося адпампоўваць ваду на тэрыторыі аўтастанцыі, прыбіраць паваленае дрэва з дарогі на вёску Мыслабаж.
Навальніца пакінула след і на сельгасугоддзях. У райаграсэрвісе на плошчы 56 гектараў «лёг» рапс, у іншых гаспадарках падтоплены палеткі, таксама ёсць палегліца.
Як паведамілі ў АДАІ, з-за неспрыяльных умоў надвор’я вечарам мінулага аўторка адбыліся 3 дарожна-транспартныя здарэнні, на шчасце – без чалавечых ахвяр. У аграгарадку Навасёлкі, на аўтадарозе Ляхавічы-Сваятычы, у райцэнтры на вуліцы Дзесюкевіча не размінуліся аўтамабілі. У Ляхавічах вінаваты ў ДТЗ уцёк з месца аварыі, аднак хутка яго асоба была ўстаноўлена. Цяпер вадзіцелю давядзецца адказваць і за ўчыненне ДТЗ, і за тое, што пакінуў месца здарэння.
Галіна ЗАРЭЧНАЯ.
Фота Сяргея ВАРАНОВІЧА.
