Жыццё працягваецца

Увага дзяржавы і грамадства да людзей з абмежаванымі  фізічнымі магчымасцямі заўсёдная. А ў Дзень інвалідаў іх запрасілі ў гарадскі Дом культуры, каб даведацца пра жыццё, патрэбы, проста падтрымаць маральна. Да ўдзельнікаў сустрэчы звярнуўся старшыня райвыканкама Дзмітрый Бурдук, які расказаў пра тое, што робіцца ў раёне для стварэння безбар’ернага асяроддзя, пра занятасць інвалідаў, імкненне раённай улады дапамагчы людзям, якіх ён назваў моцнымі духам. Сапраўды, многія з іх, нягледзячы ні на што, знаходзяць у сабе сілы не проста жыць, а быць карыснымі грамадству. Пра гэта красамоўна расказала выстава работ інвалідаў, арганізаваная ў фае ГДК спецыяльна да гэтай сустрэчы.

Цікавы канцэрт падрыхтавалі да сустрэчы: спявалі, танцавалі. Але не толькі самадзейныя артысты. Народную песню выканала Галіна Зыранава – мужная, прыгожая і светлая душа. Яна прыкавана да інваліднай каляскі, але не скараецца лёсу, бо, як сказала Галіна, жыццё працягваецца.

Многія людзі з абмежаванымі магчымасцямі (у асноўным тыя, хто выставіў свае работы) атрымалі падарункі, якія ўручыла дырэктар тэрытарыяльнага цэнтра сацыяльнага абслугоўвання насельніцтва Галіна Пішч. Спонсарам выступіў прадпрымальнік Андрэй Дуганаў.

Аліна ЛАПІЧ