18 лютага ў Беларусі адбыліся выбары ў мясцовыя Саветы дэпутатаў

18 лютага ў Беларусі адбыліся выбары ў мясцовыя Саветы дэпутатаў. Роўна ў 8.00 адкрыліся ўсе 5870 выбарчых участкаў. На працягу дня тэлебачанне і радыё вялі прамую трансляцыю з участкаў, акруг, перадавалі актуальную інфармацыю Цэнтрвыбаркама. У 20.00 участкі для галасавання закрыліся, пачаўся падлік бюлетэняў.
Паводле папярэдніх даных ЦВК, у Беларусі прагаласавала 77,23 працэнта выбаршчыкаў. Удзел у галасаванні прынялі 5 346 166 грамадзян, унесеных у спісы выбаршчыкаў.
«Выбары прайшлі арганізавана, пры высокай яўцы выбаршчыкаў. Яна была даволі высокая ў перыяд датэрміновага галасавання: 35 працэнтаў – гэта нямала», – паведаміла журналістам старшыня ЦВК Лідзія Ярмошына.
У мясцовыя Саветы выбраны 18 110 дэпутатаў.
Прэзідэнт Рэспублікі Беларусь   Аляксандр Лукашэнка 18 лютага прыняў удзел у галасаванні на ўчастку № 1 Вяснянскай выбарчай акругі № 39   Цэнтральнага раёна Мінска, размешчаным у Беларускім дзяржаўным універсітэце фізічнай культуры. Пасля галасавання Кіраўнік дзяржавы сустрэўся з журналістамі і адказаў на іх пытанні.
Арганізавана прайшлі выбары і на Брэстчыне.
Усе Саветы дэпутатаў Брэсцкай вобласці сфарміраваны ў поўным складзе, паведаміў на прэс-канферэнцыі старшыня абласной выбарчай камісіі Аляксандр Каляда. Ён расказаў, што ва ўсіх 2962 акругах, утвораных на Брэстчыне, выбраны дэпутаты. У тым ліку ў абласны Савет выбрана 57 дэпутатаў, у раённыя – 500, гарадскія – 107, сельскія –  2222, Саветы гарадоў раённага падпарадкавання – 76 дэпутатаў. Па папярэдніх даных, у галасаванні прынялі ўдзел 79,56 працэнта выбаршчыкаў рэгіёна, у тым ліку правам датэрміновага галасавання скарысталіся 31,8 працэнта ўключаных у спісы грамадзян. За ходам галасавання на Брэстчыне назіралі 4774 наглядальнікі.
Як адзначыла старшыня ЦВК Лідзія Ярмошына, падвесці вынікі мясцовых выбараў плануецца не пазней за 23 лютага. Мясцовыя Саветы дваццаць восьмага склікання паўнацэнна пачнуць працаваць на працягу месяца.
Па матэрыялах БЕЛТА.