Беларускія ВНУ гатовы прыняць на бюджэтныя аддзяленні сёлета на 626 студэнтаў больш

У вышэйшыя навучальныя ўстановы Беларусі на навучанне за кошт сродкаў рэспубліканскага бюджэту ў 2010 годзе запланавана прыняць 33 тыс. 320 чалавек, што на 626 чалавек больш, чым у мінулым. Аб гэтым паведамілі ў Міністэрстве адукацыі.
Таму план прыёму ў ВНУ Мінадукацыі будзе павялічаны на 350 бюджэтных месц, МУС — на 200, Мінтранса (дэпартамент па авіяцыі) — на 41, таксама павялічаць прыём на некалькі студэнцкіх месц ВНУ міністэрстваў культуры і спорту і турызму. «Некаторыя ВНУ зменшылі заяўкі на завочнае аддзяленне і перадалі гэтыя месцы на дзённыя, а іншыя — скарацілі наборы», — расказалі субяседнікі.
Як адзначылі ў ведамстве, упершыню Акадэміі кіравання пры Прэзідэнце Рэспублікі Беларусь выдзелена 15 бюджэтных месц на завочную форму атрымання адукацыі.
Павялічаны набор будзе праводзіцца на тэхнічныя, будаўнічыя, тэхніка-тэхналагічныя і энергетычныя спецыяльнасці, а таксама на спецыяльнасці, звязаныя з атамнай энергетыкай і інфармацыйнымі тэхналогіямі.
БЕЛТА.