Адрасам раённых зажынак стаў СВК «Шлях новы»

Калі разважаць у «сістэме каардынат» зажыначнага поля, навасёлкаўскі сноп абяцае быць добрым ці нават вельмі добрым. Наколькі далёка магло зачапіцца вока, палетак азімага трыцікале выглядаў не проста прывабна, а неяк вельмі ўжо эстэтычна-правільна. Роўная і густая, параўнальна невысокая хлебная ніва калыхалася пад ветрам жоўтым акіянам моцных каласоў. Не паддалася націску непагоды, не страціла стройнасці радоў і нідзе перад ёй не схілілася.

Іншая справа — адказаць паклонам на паклон шчырай жняі, схіліць пад яе ўмелым сярпом свой буйны колас. Колас да коласа — і вось вам першыя снапы новага ўраджаю. Яны — гаспадарам зямлі: па этыкету, па традыцыі, па праву. Як сімвал найвялікшай важнасці і важкасці хлебаробскай працы, прадметны вянец земляробчых намаганняў, падзяка за руплівасць. Жнеі, а ў нашым выпадку ў суправаджэнні ансамбля песні «Вечарніца» Навасёлкаўскага СДК зажыналі ўдзельніцы фальклорнага калектыву Падлескага СДК, перадалі  тугія снапы калосся старшыні райвыканкама Дзмітрыю Бурдуку і яго намесніку Мікалаю Варажуну, старшыні СВК «Шлях новы» Аляксандру Вашчуку, кіраўнікам іншых сельгасарганізацый Ляхавіччыны.

«Настаў час уборкі хлеба! — звярнуўся да ўдзельнікаў жніва кіраўнік раёна. — Жніво — адказнейшая работа для хлебароба. Ураджай сёлета добры, і наша задача сабраць яго як мага хутчэй і якасней, без страт і без шкоды здароўю. Тэхніка бяспекі — галоўнае і на ўсіх участках уборкі, на кожным рабочым месцы павінна бездакорна захоўвацца…»

Богаслужэнне з нагоды ці ў прысвячэнне святу першага снапа, акрапіў даволі такі свежы дожджык. Нікога не засмуціў і не надта паўплываў на мажорны настрой зажынак.

Дарэчы, папярэдні сцэнарый не прадугледжваў  удзелу ў зажынках архіепіскапа Пінскага і Лунінецкага Сцефана. Факт тым не менш: воляй божай уладыка засведчыў сваю прысутнасць на хлебным палетку. Блаславіў людзей, правёў абрад асвячэння, адзначыў асаблівую высакароднасць працы хлебароба. Між іншым, сам спрабаваў і ведае па чым фунт хлеба: у свой час будучы ўладыка скончыў адну з сельскагаспадарчых навучальных устаноў і нейкі час працаваў па профілі.

Такім чынам, жніво-2012 стартавала афіцыйна і масава. У працаўнікоў агракомплексу наперадзе кавалак адказнай і тэхналагічна далікатнай работы. На палетках Ляхавіччыны паспела ці вось-вось выйдзе ў фазу ўборачнай спеласці каля 16 тысяч гектараў зерневых і зернебабовых пасеваў, больш як 3100 гектараў азімага рапсу…  Іменна на палетках апошняга гэтымі днямі асабліва «цесна» і горача. Надвор’е карэктыруе ўборачныя намаганні, аднак, на дзень напісання гэтых радкоў, на рапсавым полі не «засвяцілася» толькі адна з гаспадарак раёна. Іншыя — хто больш, хто менш — паспелі папоўніць засекі  алейным насеннем новага ўраджаю. У цэлым па раёне абмалочана прыкладна палова пасяўных плошчаў пры сярэдняй ураджайнасці блізкай да 21 цэнтнера на   круг.

Але не толькі рапс на парадку ўборачнага дня: большасць сельгасарганізацый раёна паспрабавалі сябе таксама і на зерневай ніве. На ўсіх абмалочана пакуль што каля трох соцень гектараў.

Вызначальнымі словамі ўборачнай кампаніі можна пазначыць тэмпы і якасць. Так заўсёды, але сёлета, як ніколі раней, для гэтага ёсць усе перадумовы, магчымасці, не займаць жадання. Напрыклад, той факт, што ўборачны караван гэтага года выглядае заметна больш новым, чым летась,  гаворыць аб многім. Знайсці на палях уборачную тэхніку не апошняга пакалення з’яўляецца сёння ўжо няпростай задачай. «Новы шлях» стаіць асобна, аднак, і на яго прыкладзе можна меркаваць аб істотным абнаўленні за апошні час камбайнавага парку раёна. З 7 адзінак зернеўборачнай тэхнікі гаспадаркі самым старым з’яўляецца КЗС-10, што пакінуў зборачны канвеер у 2008 годзе. Астатнія больш познія, а для некаторых сёлетняя ўборка будзе, увогуле, дэбютнай.

За якасць — дадатковы «пернік». Як, дарэчы, і штрафныя санкцыі ў выпадку яе адсутнасці. Распрацаваны ў «Шляху новым»уборачны рэгламент прадугледжвае дыферэнцыяцыю ў аплаце працы экіпажаў камбайнаў у залежнасці ад якасці выкананай работы. Прынятая за «базу» здавальняючая ацэнка працы дадаткова не заахвочваецца. Павышаючы каэфіцыент уводзіцца толькі ў выпадках якасна добрай і выдатнай работы камбайнераў. І, дарэчы, паміж «здавальняюча» і «выдатна» — вялікая грашовая розніца.

На тэмпах таксама можна дадаткова зарабіць. Але, зноў-такі, спяшацца трэба з аглядкай на якасць, не ў страту апошняй. Удзельнік уборачнай кампаніі  (не абавязкова экіпаж камбайна), хто стане першым тысячнікам, атрымае салідную прэміяльную выплату. Усе наступныя таксама не будуць забыты, хоць вызначаныя прэміяльныя сумы і маюць пэўнае адрозненне.

Прадугледжаны і шэраг іншых нюансаў, на якіх можна як дадаткова зарабіць, так і неабдумана недазарабіць. Скажам, парушэнні працоўнай дысцыпліны, правілаў тэхнікі бяспекі, тэхнікі пажарнай бяспекі гарантуюць прымяненне штрафных санкцый. «Не дапусцім апошняга», — паабяцаў у адказ на пытанне карэспандэнта адзін з навасёлкаўскіх хлебаробаў.

Іван КАВАЛЕНКА